Ka seiñ All Jaiñtia Poultry Trader Association (AJPTA) ynne i step heipor kamwa 7 waje da kem ko ya le tylli ki kari kit syiar na baar jylla kiwa thmu wow wan dai khutia lane dailang (Wholesale) hapoh Ri-loom Jaiñtia.
Kam wow pynkynmoo neiliang ka seiñ dadep ksoh wei pynuiñ ko ya kiwa wan dai khutia ha kini ki por wa dadep tangwa kini ki bru ym mano ki heiwa dang pteiñ ki wow wan dai khutia ya ki syiar hadooh ynne ka sngi khlem burom ya i rai ka Association.
Ka seiñ da klam che ko kdar wa ym chong kli-kti ko deiwa kynreh ya ki kari ha iwon iwon i por.
Da pynche leh deiwa ong wa da leh yeini khnang wow lait u kulmar ha yaw ha haat khamtam heiyatoh wa i dor i doh syiar kamjooh leh wa da khang ka sorkar wow wanrah syiar neidaw wa em ka kjut syiar (Bird Flu).
Kani man ko katkam ka Wyrta wa da phah da u R. Rymbai uwa man kam u General Secretary ka seiñ.
