Ka Ïewduh ynne ka sngi da sdang khai im biang ko hadien 2 bnai duna wa da khang khyrdep neidaw yong ka Lockdown wow yada nei poor yong u khñiang khlam COVID-19.
Ynne ka sngi hadien wa ki bor pynlai District da e laad ki wow wai 20% ki dukan wym dai marbaam wa ya kiwa chongdai madan, heiwa neiliang u Acting Syiem ka Hima Mylliem deilang wa ki Montri yong ka Hima da lai pait biang ki ya ka Ïewduh wow pyntikna wa ini i e laad wow wai ya ka Ïewduh ym wanrah i yei maa, heiwa da pynkynmoo bait ya kiwa chong yaw wa kiwa lai thied wa bood ryntih wei da pynrkhiñ bha ya ki kyndon wa da phah da ka sorkar lyngba ka chnat i chait i khiah.
U Paiem Ainam Manik Syiem da ong u wa kamwa man ynne ka sngi, kiwa chong yaw bood ki ya ki kyndon kamwa da phah wei da em kattu katni ki dukan kiwa leh tam wei da phah khang noh hadooh 2 tayaw kam i pynchitom. Da pyntip u wa ha ki khyrdop yong ka yaw da pynjoor bha leh ya i sonteri da ki pulit, wei da paitbniah leh ya kiwa psiah cha Ïewduh deiwa yarap ki pulit wa ki Enforcement ka KHADC najrong ki pulit Syiem.
Da pyntip u wa ya ki dukan da e laad wow wai katkam ki dak thoh (Alphabet), khnang wa kiwa chong yaw u yoh ki wow wai arsien chi tayaw markylliang.
