Jowai: Kani ka um toh kawa em hapoh ka dorbar chnong Chilliang Raij lane kamwa jooh tip ia ka kam ka Khon Raij. Kani ka um hawa peit ia ia ka yo kaam kawa mih nakhap u Mootha lane Moo Heh weiwa ym chem iei thaw mih ko.
Ia kani ka um toh da sumar ia ka da ka Beipun Rangkit. Ia kani ka um da khang wym hoi u sait thad, sait kari wa kiwi kiwi hapoh u pood u sam u iong ka weiwa ym chah u psiah chapoh iong ka daki slipar ki juta.
Kani ka um da man ko kawa kyrpang bha wei wa da khut ia ka leh kam ka um blai. Kani ka um ym jooh duna ko lada heipor tlang ne liur. Hei thaw mih kani ka um da em kam leh kam ka dabor wow chong ka um kawa mih naka, hei thaw mih ko da booh da u siej kam wow diang iow ioh ki nong wan tong um u diang rap ha khmat i thaw mih ko weiwa da siang daka sla lamet kamwa diang ia ka um ha u siej.
Ki bru kiwa dang ksoh ia ka Niamtre na kylleiñ ka chnong Jowai lada em i kjut chitom da lai diang um ki neini iow lai blai lai syiem ki. Katni ia kani ka um da ker da kah ia ka daka khyndaw bilat ha tala wiar iong ka weiwa hachwa u ker ki ia ka da em ka ngooh ka dem wa da hap u lai blai lai syiem kam wow iachem waka Beipun Rangkit hadien neite dei ioh bor iong ka hi te nood ki u chna pynmiat iei ni i thaw iong ka.
Discussion about this post