Kam ka dak u pynku yei rukom chakri yong ka sorkar yei rukom krehkaam yong ka ha ki C&RD Block, U Montri Rangbahdooh yong ka ri, u Narendra Modi, ha ka 30-09-23 da wai paidbah u ya ka Aspirational Blocks Programme (ABP) kawa chi tayaaw lynter kawa khut kam ka “Sankalp Saptaah”.
Ha kani ka chi tayaaw da em boonjait ki kaam kiwa da sdang nadooh ka 3 tarik uni u bnai wei daw pynkut ha ka 9 tarik uni hi u bnai. Wei ha kini ki sngi da pynman ya ki yalang kiwa yatoh nadooh i chait i khiah, i leh khooid, i rep i riang, ka puræ puthi, ka yoh ka kot wa kiwi tawon, heiwa ka NITI Aygyog da man ko kam ka chnat wa pynkrehkaam wei wow pait ya kani ka Aspirational Blocks Programme.
Katwa kamtæ, neiliang ka Agricultural Technology Management Agency, West Jaiñtia Hills District, da pynman ko ya kani ka Aspirational Blocks Programme “Sankalp Saptaah” ha ka 6 tarik hajrong ka phang wa ong “Krishi Mahotsav” deiwa embynta lang ki warep ka thaaiñ.
Ya kani ka yalang da pynlai da u Mendon Dkhar, Deputy Project Director, West Jaiñtia Hills uwa da e leh yei klam hajrong i thmu kamjooh leh i myntoi yong kani ka Aspirational Blocks Programme (ABP). Da pdiang burom u leh ya ki warep wa da pynlait ki yei por wa kordor yong ki.
Da yoh leh i lam lamphrang na u Pynshngain Lyngshiang, Block Technology Manager, Thadlaskein Block heiwa da batai u chaphang i rep kre (Millet) wei da pynchlur u leh ya ki warep wow rep ki ya u kre wa man uwi na ki jait thung wa tei yei doh i pran.
U Rimiki Suchiang, SMS, AH&V, KVK West Jaiñtia uwa man kam u kongsan ha kani ka yalang da batai u chaphang i ri ya ki syiar, sniang, masi weiwa kammon u e baam e dih kamjooh leh i sumaar ya ki mrad wa ri khnang u lait ki nei kjut wa boon jait. Da batai u leh yei rukom rep ya u Azolla uwa man u phlang wa ye u pynsboh ya ka khyndaw wei da batai u leh ya i rukom rep yei ki baam masi nadooh u salah dieñ, u phlang napier wa kiwi kiwi ki phlang wa yarap ya ki masi.
Katwa ha ka Technical Session won da yoh yei klam na u Sainborlang Dkhar, Assistant Technology Manager, Thadlaskein block uwa da khana chaphang ki Scheme waphær waphær nadooh ka Scheme NFSM, PM-KISSAN, Fruit Development Scheme, Vegetable Development Scheme, PMFM wa kiwi tawon ki Scheme kiwa myntoi ya ki warep. Da batai u leh yei myntoi na ka GOBAR-DHAN Scheme kawa ye u kamai spah na ki sboh wa chna na ki jhoor pyut, ki phlang wa ka ait masi. Da khana u leh kammon wow pynkylla sboh yei ait masi khnang yow ye u pynemkaam hei chet i tu.
Da yoh leh yei klam na ka Darappbiang Mulieh (Progressive Farmer) kawa man kawai na ki warep wa rep bha ya u kre ha ki thaaiñ Khanduli, kawa da khana yei lai luti ko hei rep kre deiwa ong wa hadien wa dep ko u rep ya u kre u wa yoh symbe na ka yung krehkaam ka Agriculture, da thrang ko leh wow pynkylla cha ki mar baam ya uni u kre deiwa chim ram ko khnang yow thied ya ka kor tylliat kre. Da chna ko leh boon jait ki baam na u kre kam ki baam dih cha, u Cake, u Powder wa kiwi tawon. Da ye ko leh u pynlai yaaw ya kini ki jait baam ha waroh ka jylla kamjooh leh da chimbynta ko ha kiwa boon ki Exhibition khnang wow ye chooh u pynlai yaaw ya kini ki mar baam wa da chna ko na u kre.
Ha ka bynta wa khaddooh yong kani ka yalang, da pynyoo leh yei rukom chna ya ki sboh Jivamrit da u Sainborlang Dkhar. Da yoh leh i pynyoo yei rukom rep deiwa pynemkaam da ki kor da u Meban Kharbuli, Farm Manager, KVK uwa da ong wa i rep da kini ki kor pynsuk ko ya ki warep kamjooh leh pynduna ko yei lut i sep. Da batai u leh yei myntoi i rep jarain (Buck Wheat) deilang i ri ngap. Da pynyoo u leh i rukom chan yei sboh wieh (Vermi Compost).
Ya i klam e khublei da e da u Solomom Keri, Block Technology Manager, Laskein Block heiwa da e khublei u ya ki warep wa da pynlait ki yei por wa kordor yong ki. Da e khublei u leh ya u kongsan wada pynchat u yei kyntien wa kordor yong oo. Kamjooh leh da e khublei u ya kiwa klam waphær waphær wa da e buit e budia kammon u pynku ya ka rep ka riang ha kani ka thaaiñ wei kamjooh leh ya kiwa embynta lang ha kani ka sngi.
Discussion about this post