Ka seiñ FKJGP-Khliehriat Circle ynne ka sngi hapoh i yahkhmat u President ka seiñ u Michal Chyrmang deilang wa u Vice President, u Wanky Lyngdoh, u General Secretary u Fullmoon Nongtdu wa ki kattu katni ki dkhot yong ka seiñ da lai khang tala ki ya kawi ka dukan yong u baar jylla hadien wa ka seiñ da yoh ko ya kawi ka ujor na kawi ka manbei wa kani ka dukan da dai ko ya ki jait baam wa da kut por cha ka.
Neiliang ka seiñ da lai kynreh ko ya katai ka dukan wa dai marbaam kynnah wa em ha Ladrymbai Dongwah, heiwa hei kynreh da ka seiñ da yoh wow khyrrup chiboon ki jait baam khynnah kiwa da kut por wei marsien yoo yeini da pyntip cha u Food Safety Officer yong ka East Jaiñtia wei neiliang yong ki bru ka Food Safety leh dapoi ki cha katai ka dukan wei neiliang yong ki da rah ki ya kitai ki marbaam yow leh yeiwa emkaam.
Ka seiñ da pyntip ko wa u tre dukan da tyrwa u da ki phaw hajar ya kiwa yahkhmat ka seiñ wow suki hi-eh ki tangwa ki dkhot ka seiñ ym bien ki neibhah ini iwa leh u da booh ko hei maa ya ki khon ka East Jaiñtia heiwa da chem wa uni u bru ym em u wot ya ka Trading License.
Kamtæ ka seiñ da kyntu ko ya ki paidbah wow pait bha ya ki tarik ki mar wa thied ki khamtam ki marbaam-khynnah heiwa ka seiñ da maham ko leh ya kiwi ki dukan kiwa jooh myllien wow dai yaki marbaam wa da kut por wei ka seiñ da kyntu ko leh yaka chnat Food Safety wow lai sylli man-i-por yaki dukan marbaam khnang wym booh ini i leh ki tre dukan hei maa ya ki paidbah.
