Ka Dorbar Chnong Ialong nadooh myntu ka 21-05-21 kam chibynta i yaleh pyrchah yei chyrkhei poor u khñiang khlam COVID-19 ha kani ka la-ær wa ar, da kyntu ko ya ki paidbah wow man ki kiwa syndong, kiwa sumaar bha neibynta i chait i khiah khnang yow ye u yaleh pyrchah ya uni u khñiang khlam chirup chirup hadooh wow yoh yei jop wa pura.
Kamtæ ha kani ka yakhun ya uni u khñiang khlam dei wym yohsa, ka Dorbar Chnong Ialong da hap khang chwa ko chi por ya kiwa wan khwe cha ka Wah Myntdu kawa em hapoh ka chnong Ialong, kamjooh da khang ya ki thaw uiñke suwari wei ym chah ya kiwa wanke suwari u wan ki ha kini ki por chapoh ka chnong Ialong (Ialong Park, Um-Dalong Fish Sanctuary), West Jaiñtia Hills District wa kiwi tawan ki thaw uiñke, kamjooh da khang ya i mih i psiah kiwa na baar chapoh ka chnong Ialong khlem da yoh bor na ka chnong.
Heini i por da kyrpaad ya waroh kiwa puræ ya ini i pynbna wow man phi kiwa ya krehlang kamjooh u man phi kiwa yaichah ha kani ka kynti heijooh i por wow pyntip lang ya ki para marjan yong phi ya ini i pynbna.
Heiyatoh won wa ka Lay-by Market (Yaw dailang) da pynkup bor ya kiwa wan, kiwa chong yaw wow kitkhlieh phi ya i khooid i jngiar ha waroh soodong i dukan yong phi, wym hoi u em kiwa noh jhep roi, da kyntu ya waroh wow bood ryntih ki ya ki kyndon (Protocols) ka sorkar deiwa deiñ bha ya ki Face Mask, u yajngai uwi na uwi kamwa 2 Meter, kamjooh wow sait khooid ya ki kti yong phi da ki sabon, ki Hand Sanitizer wei lada em kiwa leh pyrchah, ka Dorbar Chnong daw chim ko da i rai wa eh.
Katwa kamtæ da kyrpaad ya waroh kiwa wan yaw kiwa chong yaw wow man phi kam ki Volunteers lada em kiwa lai lait ya kini ki kyndon wa da pynbna.
Ini i pynbna u neh ko hadooh wa pynbna deiwa tawan.
I pyntip lyngba u Waheh Chnong Ialong u T. Ram Phawa.
