Ka KSU Jowai Circle hapoh i yahkhmat u Ioanis Suchiang, President KSU Jowai Circle, u Leningrad Tariang Organising Secretary KSU Jaiñtia Hills wa kiwi ki dkhot ynne ka sngi da lai khang ki ya ka Toll Gate kawa em ha Ialong, West Jaiñtia Hills neibhah wa ka NHAI ympu ye ko wow pynkrehkaam ya ki mat dawa ka seiñ la chi bnai tam kattu itæ wow chna pynmiat ya ki sarok katkam u pood wa haap hapoh kani ka Toll Gate, i wym pynkrehkaam ya ki Street Light kiwa ympu krehkaam hadooh katni nawa pyndait ya ki wei boon da sap sarah ki iwa da wanrah pathan yei maa ya ki paidbah.
Ka seiñ da ong ko wa kamwa ka NHAI da khrong dan ko na ki paidbah miet wa sngi kamtæ da toh wow pyntikna ko wa u sarok toh uwa bha wei emkaam wow pynbiang yeiwa emkaam waroh.
Ha ki kynta wa khang ya kani ka thaw, ki kari da lai ki lyngba kani ka Toll Gate khlem su ya ka dan neibhah kiwa kreh kani ka thaw da sangeh ki yei kreh yong ki.
Kamtæ hadien chipor da wan hiar ki Magistrate wa kynthup ya u MA Challam, u AS Mukhim, ka CW Lyngdoh DSP, West Jaiñtia, u KS Lywait SI In-charge ka Phramer Traffic Cell, u waheh chnong ka Ialong wa kiwi kiwi.
Neiliang u Challam da pynche u cha ki dkhot ka KSU wa ka NHAI dadep thoh ko cha ka MePDCL wow pyndait bordiñ noh tangwa hadooh katni ympu yoh ya iwon iwon i jubab.
Heiyatoh won wa ki luti lai-kjat neidaw wa hap chna ha i jngai wa 2 Meter na surok da em leh ka sorjamin (Joint Inspection) wei ya ka bui na kani ka sorjamin da phah cha ki bor wa hajrong.
Kamtæ hadien wa ki wakreh ka Toll Gate da pynyoo ki ya ki chithi wa da phah cha ka MePDCL ka seiñ da wai biang ko ya ki tala deiwa ong wa da leh ki yeini toh wow pynkynmoo wa da kut i e por khlem iwon iwon i mih soh.
Chooh chooh ka seiñ da ong ko wa daw booddien ko ya ini i kaam neini chaphrang hadooh wa poi ha ka thong.
