Deiwa ya krehlang wei chimkhia yeiwa da rai ka Mizoram Football Association wow khang (Ban) ya 25 ngut kiwa yalehbol hapoh Mizoram, neiliang ka Meghalaya Football Association (MFA), ynne leh da chim ko yei jooh i rai wow khang yei wan yalehke kini ki 25 ngut hapoh Meghalaya.
Ka Mizoram FA toh kawa da dep wow pynman yei takit deilang wa ki bor ka aiñ heiwa da chem wa kini ki 25 ngut toh kiwa embynta wow leh thok namo ka Match Fixing hadooh wa hap chim ya ka rai wow khang noh u yalehke ki iwa da pynbna ynnin ka sngi.
Kamtæ ka Meghalaya FA hadien wa tip yeini da rai ko wow leh yei jooh neibhah kini ki jait kaam toh kiwa ktah bha ya ka yalehke wei ym chah de wow yalehke kini ki 25 ngut hapoh Meghalaya la ha kawon kawon ka League yong ki District Association wa tipmit da ka Meghalaya FA.
Chooh chooh da chem leh wa kini kiwa yalehke na Mizoram da jooh yalehke ki wa ki Club wa em ha Meghalaya nachwa.
Da ini, ka Meghalaya FA da yooluti ko wow phah ya ka khubor wa che wym toh u pyrchang ya kam kini ki kaam iwa daw ktah ya ka mynried ki kam kiwa yalehbol.
I pynbna na ka Mizoram Football Association toh da khang hadooh chi snem, 3 snem, 5 snem wa hadooh waroh chi rta wow yalehke kini deilang wa 3 tylli ki Club wa 3 ngut ki Official.
Discussion about this post