Jowai: Ka sorkar ka jylla Nagaland da pynmih hukum ko wow khang lut u pynemkaam ya ki Plastic kiwa pynemkaam chisien dep te noh neidaw wa da joor ktah ko ya ka rymaw.
Katkam ka hukum wa pynmih haka Nagaland Gazette haka 17 tarik uni u bnai waroh ki plastic kiwa em thaw rah kamjooh kiwa ym em thaw rah lada man ki kiwa rben namo kiwa stang nadooh ki khuri, ki pliang, ki siang kamjooh ki Styrofoam (Thermocol), Polythene, Nylon, Poly Vinyl Carbohydrates (PVC), Poly Propylene wa Poly Styrene u khang lut ki waroh.
Kani ka hukum u krehkaam ko hadien 3 bnai wa pynmih yaka yow e laad ya kiwa pynmih, kiwa dai dukan wa kiwi kiwi yow pynlut noh ki ya iwa da em chwa ki ki Plastic yow lait ki u dooh nong.
Ha ki kyrdan District da chna da ki District Task Force yow pyntikna wa ya kani ka hukum man ko kawa krehkaam.
Ya ini i jooh leh nadooh ka 15-08-19 ka chnong Ooty kawa pawnam wa kiwa lai uiñke suwari kawa em hapoh ka jylla Tamil Nadu daw leh kamjooh heiwa ka Nilgiri District Administration da khang ko wow pynemkaam ya ki klong um Plastic kiwa pynemkaam chisien dep te noh wa kynthup leh ya ki klong Soft Drink wa ki baam wa song ha ki Plastic ha ki bynta wa em ka sarok bah wa ki chnong wa heh hapoh ka District.
Ya ini da leh hadien wa ka Madras High Court da pynmih hukum ko ha u bnai wa da dep wa phah ya u DC wow pyntikna wa ym chah u psiah ki mar wa song hapoh Plastic chapoh ka District.
Kiwa chong chnong hapoh ka Nilgiri da yaleh mukotduma ki wa neidaw wa wan da ki phaw lak ngut kiwa uiñke suwari chapoh ka District da pyntngit ki deiwa ieh roi ya ki Plastic.
Kamtæ nadooh ka 15-08-19 kiwa psiah chapoh ka Nilgiri District kam na Burliar, Kunjapanai, Kakkanallah, Nadungani, Thalur, Solladi, Pattavayal, Nambiar Kunnu wa Geddai. Kiwa wan uiñke suwari ym chah de ya ki wow rah ki ya kini ki jait Plastic kiwa da chah khang.
Discussion about this post