Shillong: Ka National Commission for Protection of Child Rights (NCPCR) da pyntip ko wa da em ki TV News Channel wa kiwi ki laad pathai khubor da pynyoo ki yei dur ka wi ka khynnah wa dang 8 snem kawa chah slaitbor wei chah tynyap ha i chnong Rasana wa em ha Kathua District ka Jammu & Kashmir.
Ka NCPCR da ong ko wa i pynmih ya ki dur ya kiwa chah slaitbor kamjooh ya ki khynnah wa chem ya kam kini ki jait kaam man ko pyrchah ya ka kyndon Section 74(1) ka aiñ Juvenile Justice (Care and Protection of Children) Act, 2015 wei kiwa leh ya ini daw ye ki u chah kem hanlada ki dur wa pynmih toh yong kiwa da khlaad kam wa jia ha kani ka kynti.
Ka Commission da ong ko leh da pyntip ko ha u Wisu (April) wa ym hoi leh u khana yei pyrtuid ki khynnah hanlada man ki kiwa da khlaad wei kani da tyngkheiñ ko ya ka kyndon 74(1) kani ka jooh ka aiñ.
Ka sorkar India leh da pynche ko wa ka Section 74 ka Juvenile Justice (Care and Protection of Children) Act, 2015 da khang ko wow pynmih pyrtuid yong ki khynnah kiwa ngat ha ki kaam wa pyrchah yei hok yong ki hanlada man ki kiwa da khlaad leh.
Ka Section 74 ka Juvenile Justice Act, 2015 da ong ko wa ymtoh u mih i pyrtuid ki khynnah ha ki kot khubor, ki Magazine, radio wa kiwi ki laad pathai khubor wei ym chah leh u pynmih pyrtuid ya ka skur wa lai puræ ki, i chnong wa sah ki kiwa ye ki bru wow tip yei pyrtuid ki khynnah lada man ki kiwa dang im kamjooh kiwa da khlaad.
Ka Committee ye ko u e laad leh wow pynmih ya ki dur ki khynnah lada sñiaw ko wa daw yarap ki ya ki khynnah.
Kiwa tyngkheiñ ya ki kyndon ka aiñ ye ki u chah kem hadooh 6 bnai wei ye leh u chah pyndaiñ kuna hadooh T. 2 Lak.
Discussion about this post