Ka Chnong Panaliar, Jowai hadien wa dadep wan u slap yong ka liyur da jooh pynkhooid pynjngiar ko kamwa jooh leh khlieh u snem ya ki bynta ki rood ka wah Myntdu wa em hapoh u pood u ang yong ka, khamtam ka Syntu Ksiar.
Kamtæ ha uni u snem leh da phah pynkhooid ya i bynta ka Syntu Ksiar weiwa da pyndam leh ya i thoh (Signboard) wa jooh booh ka Jaiñtia Fishing and Environmental Protection Association (JFEPA), Jowai hajronng ka yurim wa katai ka seiñ da kut ka NOC yong ka kawa jooh yoh ko na ka chnong nadooh ki snem nachwa.
Heiyatoh wa ini, katai ka seiñ JFEPA da e ko da ka FIR ko ya ka chnong wei heijooh i por da maham ko leh ya ki bru wa yah yow pynkhooid pynjngiar ya katai ka thaw.
Kat da kamtæ, ka chnong Panaliar hi waroh kawi da mih i chrai yeini i leh khlem akor kiwa krehkaam ka JFEPA. Wei da khut ya ka yalang wa jhan heiwa da rai wow pyndooh pyndam chisiendon ya kiwon kiwon ki kaam wa ka Jaiñtia Fishing and Environmental Protection Association, Jowai u pynman ko hapoh u pood u ang ka chnong nadooh wa mih kani ka khubor.
Neibhah ka chnong hi da jooh pynbna ko wa ymye kiwon kiwon ki seiñ næ bru samen u pynman ya ki kaam paidbah khlem datip næ yoh bor na ka chnong. Ka jooh hi kani ka rai u neh ko ya waroh khamtam yei khlem akor ka JFEPA wei ymye ko wot u pynman Fishing Competition ha chi lynter ka wah Myntdu wa em hapoh u pood u ang ka chnong Panaliar. Lada pyrchah ki yeini, ka chnong ye ko u leh deiwa eh katkam ki aiñ chnong.
Kamtæ da kyntu ya waroh kiwa puræ ya kani ka khubor yoh ki u yatip wei u rah leh cha kiwi yow ya tiplang wa ka chnong khang ko leh ya ka yalang wa daw pynman ka Jaiñtia Fishing and Environmental Protection Association, Jowai chirup waka Rotary Club Jowai kawa daw man ha ka 24-09-2023 hapoh u pood u ang ka chnong.
I pyntip na u waheh chnong ka Panaliar, u Riquoma Rq. Laloo.
Discussion about this post