Ka Myntdu Pynthor Neiñ Farmer Welfare & Producer Organisation, da pynman ko ya ka dorbar paidbah ha ka 28-08-2021 ha Myntdu Pynthorneiñ, neibynta wow pythymme ya kiwa kitkaam neibynta u snem 2021-2023 yow pynkhlan chooh chooh ya ka rep ka riang ha Myntdu Pynthorneiñ waroh kawi, kawa man ka pliang ja yong ki Jwai, ki Khliehtyrchi wa ki Mihmyntdu.
Kiwa kitkaam kiwa da jied:
- U Pynshngaiñ Rymbai, President
- U Jur Bha Phawa, Vice President
- U Pyntngen Kyndait, General Secretary
- U Mehi Phawa, Assistant General Secretary
- Ka Chalty Rymbai, Treasurer
- U Khroo L Pariat, Adviser wa 16 ngut ki warep wa ki tre lyngkha wa kynthup ya ki kynthai wa chynrang kam ki dkhot ka Executive Committee.
Ka seiñ da maham ko wow pynchitom deiwa daiñ kuna da kawa rap heh lada chem wei yoh kem ya kiwon kiwon ki bru wa noh roi ya ki Plastic, ki jhep, ki khyndaw wa kiwi kiwi kiwa ktah ya ka um, ya ki dooid wa tooid cha ki lyngkha na sarokbah kam na Riaturiem, na Jowai By-pass Mihmyntdu-Khliehtyrchi, na yingkieñ Myntdu cha Salini Colony Mihmyntdu.
Da khang leh ya kiwa khwe wow pynemkaam da ki dawai wow pynyap ya ki dakha, deiwa tympra ya ki stiar yong ki lyngkha wei pynsngad ya ka wah Myntdu ha Pynthorneiñ, ka seiñ da khang pyrchah ko wow khwe deiwa tong dakha wa da kiwi kiwi ki laad wow yoh dakha ha waroh chilynter ka wah Myntdu wa ka liar Tyrchi ha Pynthorneiñ neibynta ar snem pura naduh u Naikhynde 2021 hadooh da pyntip da kamwi.
Ka seiñ da kwah ko leh wow pyntip wa ka pdiang ko yei pyntip u Secretary ka Executive Committee JHADC wa katkam ka hukum ka NGT, ha ka wah Myntdu da khang pyrchah wow chna ya kiwon kiwon ki jait chna nadooh ki yung ki kharkhana, da khang leh wow tih chyiap, tih moo, ah dieñ hapoh ka 50 meter na ka wah wa 100 meter wow yada ya ki tyllong um wa tooid cha ka wah Myntdu.
