Ka sorkar Manipur lyngba ka chnat Puræ Puthi da pynmih hukum ko yow khang yei pynman ya ki School Excursion hadooh ka 10-01-23 hadien wa em i kylla kawi ka Bus heiwa da dooh yei mynsien ki khynnah khynnah skur.
Kani ka hukum toh neibynta waroh ki jait skur yow lait biang u jia iwon iwon.
Kam wow pynkynmoo wa ha ka 21 tarik uni u bnai, kawi ka Bus wa kit ya ki khynnah kamjooh kiwa sikai ka Yairipok Thambalnu Higher Secondary School kawa lai cha Khoupum kam chibynta wow lai Excursion, manda poi ha Longsai Part III, sih syndet u Steering kani ka Bus iwa da pynman ya ka wow noh ko cha synrang wa yillu kamwa 35 phut heiwa da yap 9 ngut wei da mynsoo won 30 ngut kiwi wei 5 ngut toh kiwa da khlaad pyn ha ini i thaw wa jia.
Ini da jia i heipor 11:10 i step ha i thaw wa dang em hapoh ka Khoupum Police wa em ha Noney District ka Manipur.
Kiwa yap kynthup ki leh ya 2 ngut kiwa sikai wa u Warden kiwa da khlaad ha Bishnupur District Hospital iwa jngai 25 Km na ini i thaw wa jia.
Ini i thaw toh iwa da jooh jia bha i noh ki kari cha synrang neidaw wa dong bha u sarok wei ym em booh ki Guard Wall ha ini i bynta heiwa ha uni hi u bnai da em le sien wa ini wa noh ki kari cha synrang.
Ha ini i lai Excursion da lai da 3 tylli ki Bus heiwa hapoh ka Bus wa noh cha synrang da em 37 ngut hapoh wa kyntup ya 3 ngut kiwa sikai.
U Montri Rangbah ka Manipur, u N. Biren Singh da pynbna u ya ka poisa yarap wa T. 5 lak cha kiwa ha-yung ha-sem kiwa khlaad katwa neiliang ka yung krehkaam u Prime Minister da pynbna ki T. 2 lak ka poisa yarap cha kiwa khlaad wa T. 50,000 cha kiwa mynso.
