Ka sorkar Meghalaya lyngba ka chnat Health & Family Welfare da pynmih hukum ko wow khang noh wow leh ya ka Two Finger Test ya kitu kiwa chah slaitbor wei ki Doctor wym bood yeini daw chah pynchitom ki katkam ka aiñ.
Yeini da leh kam chibynta wow bood ya ka hukum ka Supreme Court ka ri India kamjooh ka Ministry of Health & Family Welfare kiwa da khang wow leh ya kani ka Two Finger Test (FTF) ha kitu kiwa chah slaitbor neibhah kani ym ye ko wow pynsakhiat yeiwa jia wei man ko leh iwa ktah yei burom wei rynyieñ kiwa chah ktah.
Kamtæ ka sorkar Meghalaya leh da sñiaw ko wa da emkaam wow yada yei burom kiwa chah ktah yow lait chooh chooh ki nei chah pynchitom.
Ka hukum ka sorkar da ong ko wa waroh ki Doctor lada kiwa kreh sorkar kamjooh kiwi, wym toh de u leh ki ya kani ka Two Finger Test ha kitu kiwa chah slaitbor wei kiwon kiwon kiwa chem wa leh yeini daw chah pynchitom ki katkam ka Meghalaya Discipline and Appeal Rules, 2019. Wei kani ye ko wow man nadooh wow chah Suspend wei chah daiñ kuna wa kiwi de katkam ka aiñ.
Da phah leh ya waroh ki Doctor sorkar wow puræ bniah ki ya ka “Guidelines and Protocols for Medico-legal care for survivors/victims of sexual violence, 2014” wa da pynmih da ka Ministry of Health & Family Welfare ka sorkar India.
Chooh chooh da phah leh wow yarap deiwa burom ya kitu kiwa chah slaitbor, deiwa pyrkhat bha yei rukom man i sñiaw ki wei wow e leh yei syllok ya ki.
Discussion about this post