Haka yachem lang haka 25 tarik uni u bnai yong ka synjuk ki 6 Waheh Chnong wa kynthup ya ka chnong Raliang, Nongkynrih, Mulum, Mookyndeng, Mulieh wa Madankynsaw-Mowkyndeng da rai da ka wi ka yumut wow booh yaki kyndon heiyatoh waka lai khwe.
Da rai chi sur wow khang yei lai khwe dakha cha ki thaw/wah kiwa haap hapoh i pait i sylli yong kitai ki 6 Chnong, ini kynthup ki ya ka wah Myntang nadooh Knor chadooh Rymphum, Sakhwe-Myntkung wa ka wah Myntrong.
Ya kani ka rai da chim hadien wa yoo kitai ki chnong wa boon ware kiwa wan na kiwi ki chnong wat nadooh na East Jaiñtia heiwa hap ki wow psiah na kitai ki chnong hawa lai khwe ki cha kitai ki wah. Kamtæ neidaw wa em kani ka khlam da rai wow khang chipor yei lai khwe cha kitai ki wah
Da chim leh sa ya kawi ka rai ha kawa ki kari kamai na kitai ki 6 Chnong hap kit ki ya ki bru kiwa na ki jar jiar ki chnong yong ki, wym chah leh u kit ki ya kiwon kiwon ki bru (Passenger) wa chem cha luti lait noh na kiwa na chnong yong ki hi.
Kani leh man ko chibynta hi wow yada kamjooh yow pynsuk yei booddien lada em i yabi uni u khñiang COVID-19 da ong u D. Shadap uwa e ktien yong ka Synjuk.
