Ka YouTube da pyntip ko wa ki laad pathai khubor na Russia kiwa da kyrchaan da ka sorkar Russia ym ye de ki wow yoh poisa (Ad Revenue) lyngba ka YouTube heiwa u daam noh u booh Advertisement ha ki Video ki Channel yong ki iwa da sariem leh ya iwa leh da ka Facebook.
Kini man ki leh kiwa da jied da ka European Union (EU) kam kiwa da chah khang nadooh wa pynbna ya ki kyndon (Sanction) ya iyi wa ye ki u leh nadooh ka khayi pateiñ wa kiwi kiwi.
Ka YouTube kawa em hapoh ka Google da pynbna leh wa ki laad pathai khubor wa kyrchaan da ka sorkar Russia ym ye ki leh wow booh ya kiwon kiwon ki Advertisement ha kiwon kiwon ki yong ka Google.
Ka EU da dep khang ko leh ya ka laad pathai khubor ka RT deiwa ong wa ka Editor-In-Chief yong ka toh kawa e khubor wa yahbakla ya ki bru neibynta i myntoi ki kattu katni.
Ini ym em mut wa ym em de ki Video kini ki laad pathai khubor ha YouTube tangwa manda thooh ki bru ya ka khubor ym pynyoo ka Google ya kini ki Video kamwa jooh leh nachwa.
