Hadien wa kiwa chong chnong ka chnong Khanduli wa em ha thaaiñ khappood da maad ki yei eh man-i-por neidaw i kajia pood hapyrdi ka jylla Assam wa Meghalaya, ha kani won ka kynti katwa neiliang ki bor District yong ki ar jylla dang thooh laad ki kammon wow wanrah yei chongsuk chongsaaiñ, kat u yoo ki Karbi won da sdang ki wow khang lai rep lai riang ya ki bru Khanduli neidaw wa ka thaw rep yong ki em ko chajan ka thaaiñ Karbi.
Da ong wa ki paaid warep Khanduli da wan khang wei wow beh ya ki da ki bru wym ye u tipmit kiwa da kah yei dur khmat katwa dang kreh ki ha lyngkha. Wei heipor wa beh da maham haroh ki kut jait, neitæ da thang haroh ki yaki yung trep wa em haki thaw rep.
Hajrong ini i chah khang, neiliang ka chnong Khanduli leh da khut ko ya ka yalang ynne ka sngi yow chim ya ka rai wow sangeh noh chwa yei lai rep, wei ki leh u khang kylla ya ki jaitbru Karbi wow lai wow wan wei wow kamai kajih cha ka thaaiñ Khanduli kat hadooh wym pu pyndam ya itai i khang yei lai rep ki bru Khanduli.
Neiliang kiwa yahkhmat chnong wa kynthup ya u waheh chnong u Yoshida Nongspung, u Chairman chnong, u Niwal Challam wa kiwi ki dkhot ynne hi ka sngi da lai pyntip ki cha u DC wa SP ka West Jaiñtia Hills District.
Heijooh i por da kyntu leh ya ki bru Pnar wa chnong marjan wow ya krehlang deiwa sangeh noh i ya dai ya thied wa ki bru Karbi katwa ym pu kwah yasuk.
