Da u: Shimphang Lyngdoh, Lumputhoi
A ma A ha skur man-ka-sngi,
Nadooh Class Nursery hadooh KG;
Ka skur chibet da wai chibet da khang,
Lada kamni tæ heiwon itæ i stat i nang.
Ki lynnong wa dep leh ki phang wa dep khreh,
Ki dak let ha kopi la waroh da pleh;
Chawah chanieñ uiñ laitlooid ki khynnah skur,
Da ka Earphone ha chkoor ki ru wa ap sur.
Wym yoo em pyrwa de yei puræ puthi,
Su i ya kmen hi-eh wow uiñ krai kti;
Manda phah Online Class won ya ki khynnah,
Waroh ki lynnong hap biang u kylla chrah.
Kat h’u wai skur biang leini sa chisien,
Waroh ki khynnah da yoo tymmen;
Nadooh Class One hadooh Five,
Ki tmaiñ da jrong i doh da sngiad.
U spær da eh u kynnoh wym tynnar,
Ki ktien dei pharæng da mih dei yong Pnar;
Wada myllien ha yung da bood latæ,
Chuti chi chuti neidaw u Covid-19.
Ki khynnah skur-kolej wa yuniwersiti,
Ha jabeiñ da zero da man thylli;
I yi sang ma-ai kat deini wa leh?
U puræ da thlan u thoh da kyrbeh.
Ki yukheiñ yudiah wada jooh ye,
La waroh kattu da man thymme;
Da mylliñ da wiar waroh ki Formula,
Ki mark yong ka risol da u zero bait i chwa.
