Ka seiñ Jaiñtia Students Movement (JSM) hadien wa kut i e por wa chi tayaw wow thung ya kiwa sikai ha ki UPS wa LPS ha West Jaiñtia Hills, ynne ka sngi heipor kamwa 11:00 waje ka seiñ da lai khang ko ya ka yung krehkaam ka District School Education Officer, Jowai.
Manda dep phah mih ya ki wakreh na kani ka yung krehkaam, ka seiñ da khang noh ko ya kani ka yung krehkaam wei ki dkhot da chong ki ha lait kani ka yung krehkaam.
Hadien kattu katni por da wanpoi ki pulit wa ki Magistrate wei da psiah chapoh kani ka yung krehkaam wow pynbait ya ini waroh.
Hawa yaklam wa u Ribok Biam uwa man u Education Secretary ka seiñ da ong u wa neipor cheipor da thoh cha ka sorkar hajrong i thung kreh ya kiwa sikai UPS wa LPS tangwa hadien wa yoo wa ym em ap ka sorkar yeini da hap leh noh deini deiwa khang ya kani ka yung krehkaam.
Da ong u leh wa ka DSEO da pyntip ko wa ha kani ka tayaw wow wan daw pynpoi noh ya ki chithi thung kreh namo ki Appointment Letter cha kiwa toh u yoh ya ini i kreh kiwa da Pass MTET.
Neiliang ka DSEO, ka A. Syiem da ong ko wa hadien i yaklam wa kiwa kitkaam ka seiñ wa kamjooh wa ki heh ka chnat puræ puthi ha Shillong da phah ki ya ka chithi wa pyntikna wow phah noh ya ka chithi thung kreh ya kiwa Pass MTET ha ki UPS wa LPS.
Da ong ko leh wa ya kini ki chithi daw chimpor wow pynpoi hadien kamwa chitayaw.
Waroh kiwa sikai LPS em ki 226 ngut wa ha UPS won 14 ngut.
