Shillong: Ki pulit ka chnat Enforcement yong ka Khasi Hills Autonomous District Council (KHADC) deilang wa ki dkhot ka Labour Union Mawphlang Circle, ynne ka sngi da lai khang tala ki chipor ya ka Techno Electric and Engineering Company Ltd (TEECL), hadien wa chem wa kani ka Company da wan krehkaam ko ha Mawphlang nadooh u snem 2017 khlem em ka Trading License hadooh katni.
Ya ki Enforcement da yahkhmat da u Superintendent ka chnat, u Albert Lanong heiwa da e por chi tayaw wow wan kiwa pynlai yong katai ka Company wow pynbiang ya ki kot ki sla wa toh u yoh na ka KHADC.
Katai ka Company da pynlai deiwa yoh yaka No Objection Certificate na ka Hima Mawphlang kawa da pynsñiaw wa ym em ko i pyrchah neibynta wow yoh ya ka Trading License. Ha katai ka Company da em 44 ngut kiwa mylla wa kynthup ya ki 11 ngut ki Khasi katwa 33 ngut won toh ki baar jylla wei ya kini leh neiliang ka Labour Union daw phah mih noh chwa na katai ka thaw, wei daw bichaar leh ya ki kot ki sla yong kini kiwa mylla kiwa wan na baar jylla.
Hawa yaklam wa ki laad pathai khubor, u General Secretary ka Union, u Rickyson Nongsiej da ong u wa ka seiñ ha ki por wa da dep, da dep wow phah leh dei thoh cha katai ka Company neidaw wa da yoo yei lai lait yong katai ka Company ya ki aiñ yong ka District Council.
Da pynsñiaw u leh yei sñiawphylla wa kani ka Company da wan krehkaam ko haka thaaiñ nadooh u snem 2017 tangwa ym pu ye ko wow pynbiang ya kiwa emkaam hadooh katni kiwa man katkam ki kyndon na ka KHADC, wei wot ya ka NOC na ka hima leh dang yoh ha uni u snem.
U Nongsiej da kyntu u leh ya ka KHADC wa toh u pynchitom ya kam kini ki Company kiwa lai lait ya ki aiñ yong ka Council deiwa daiñ kuna.
Da ong chooh chooh u wa seiñ da e por ko ya kani ka Compnay wow pynbiang ya ki kot ki sla wa kynthup ya ka Trading License wei lada kani ka Company ym ye ko, ka Union ym banse ko wow khang noh syndon ya kani ka Company.
Discussion about this post