Ka KSU Nangbah Unit ynnin ka 18 tarik hapoh i yahkhmat u Morning Star Pasi, President wa u Euginesius Hinge, Secretary deiwa emlang ki khon khynroo wa ki manbei ka chnong da lai ki wow khang tala ya ka PNB Bank Nangbah Branch hajrong i wym kheiñ snep ya ki phang dawa wow pynbiang ya ka kor Passbook Update Machine, i rukom krehkaam kiwa kreh yow e ka chakri deiwa bha tam ya ki paidbah wa chong chnong wei wow booh leh ya ka kor ATM.
Ka seiñ da ong ko wa da sñiaw sarom wa du ki kaam wa khian leh katai ka Bank wot hadooh chi snem leh hadien wa da dawa ym yoo tang iwi leh i dak neibhah kamwa man katni ki paidbah emkaam ki ya ka kor ATM khnang wow pynsuk ya kiwa chong chnong katkam wa lai i por.
Yei dawa da dep booh da ka seiñ la kamwa chi snem tangwa kani ka Bank ym bna ko iwa da pynchrai ya ka seiñ hadooh wa da hap wow rai u khang noh ya kani ka Bank hadooh wa da yoo yei dak wa da krehkaam i dawa.
Kam seiñ da e khublei ko leh ya waroh ki dkhot wa khamtam u waheh chnong deilang wa ki dkhot ka EC yong ka chnong kiwa da e yei kyrchaan wa pura ya ka seiñ.
