Ka Seng Samla Mawlai Pyllun ynne i step 21 tarik da lai ki wow khang tala syndon ya ka khyrdop yong ka Marten, hadien i wym bna ka sorkar wow pynbait yei eh wa ki paidbah yachem ki na itai i thaw noh jhep kawa em ha Mawlai Mawiong.
U President ka SSMP, u Samuel Biam da beiñ joor u ya u Montri kaam pynroi sor, u Sniawbhalang Dhar u wym chimkhia ya iwa yatoh wa i eh ki paidbah wa mih na ka Marten, deiwa pynbaad leh wa ye u man wa kani ka phang ym toh kawa myntoi iwa pynman yaki wym chimkhia, katwa ya ka kiwa yoh myntoi kam ka Shopping Mall wa thmu wow chna ha i thaw wa em ka MTC, u Montri chimkhia u neibhah wa oo pyrkhat u wow yoh myntoi samen.
Da ong u wa lada ka sorkar næ ka chnat wa toh u pait ye ko wow chim ram (Loan) neibynta wow chna ya ka Shopping Mall, iyi eh wow chim ram neibynta wow pynbiang da iwi won i thaw wow pynlang jhep wei wow pyndooh yei eh wa yachem ki paidbah ka nong Mawlai.
Hadien itai i khang yong ka Seng Samla ya ka Marten, kiwa boon ki kari kit jhep da sahkut ki ha sarok, wei neiliang ki bor pynlai District wa ki pulit leh da poi ki cha katai ka thaw, tangwa neiliang u President ka SSMP da ong u wa ka Shillong Municipal Board toh u chim ko yei kitkhlieh, neibhah wa i poi wow khang tala syndon da ka Seng Samla toh neidaw wym bna yei ood i naam ki paidbah wa chong chnong ka Mawlai.
Kam wow pynkynmoo wa ka SSMP da dep lai yachem ko ya u Sniawbhalang Dhar ha ka 6 tarik uni u bnai hawa yatoh wa i wym biang thaw noh jhep ha Marten, khamtam hawa yatoh wa i noh ya i jakhlia na ki Hospital lane ki Bio Medical Waste, wei ha katai ka sngi neiliang u Montri da kular u wow lai pait lang hapoh chitayaw, tangwa itai i kular u Montri ym em mankaam ko iwa pynman ya ka seiñ wow khang syndon ya ka Marten ynne ka sngi.
