Jowai: U Deputy Commissioner, West Jaiñtia Hills da pynmih hukum u wow chah ya u President ka Sarbamangala Kali Mandir Durga Puja Committee 2020 Dawki, Jowai wa u Dolloi ka Nartiang wow lehkmen yaka Durga Puja, Lakshmi Puja wa ka Kali Puja nadooh ka 22 tarik uni u bnai hadooh ka 26 tarik uni u bnai wa ha ka 30 tarik uni u bnai wa ha 14 tarik u Khonchonglad (Nov), 2020 ha Sarbamangala Kali Mandir, Dawki wa em pyrchah yaka PWD Inspection Bungalow, ha Shiv Mandir, Jowai wa ha Nartiang.
U Deputy Commissioner da phah u leh ya kiwa ngait niam wow bood ya ki kyndon ka Standard Operating Procedures katkam wa pynmih ka sorkar wei wow yait nei lai cha ki Puja Pandal.
Chooh chooh da khang ya ki paidbah wow thang bomkala wa kiwi ki jait wa sariem ha ki thaw paidbah, ki luti lai kjat, ki sarok heipor ka Lakshmi Puja wa Diwali khamtam kitu kiwa ood bha lada toh kiwa hær dei hær lane kiwa thang ha khyndaw wei ya kiwa chah won toh u thang du hapoh 5:00 waje i janmiet.
