Shillong: Ka chnat i chait i khiah deilang wa ki bor pulit da lai khang ki yow pynman kam ki Containment Area ya 2 tylli ki yung kiwa em ha Pynthorbah, hadien wa kiwa chong chnong da ujor ki wa ki bru wa sah ha kitai ki yung da lai ki cha ka khawai chong kurim ha Khanapara, Assam ha ka 27 tarik u Naiynru, wei i khangkset ya kitai ki yung man ko hadien wa kiwa chong chnong da yoo ki wa ki bru wa sah ha kitai ki yung da mih ki wow lai cha ki thaw paidbah iwa da wanrah ya i sier mynien ya kiwa chong chnong.
Kiwa chong chnong hadien wa yoo ki ya ki bru na kitai ki yung da mih ki chadooh wow lai cha ki dukan wa kiwi ki emkaam, da pyntip noh cha kiwa pynlai chnong, kiwa da ujor wut wut cha ki pulit wei cha ka chnat i chait i khiah. Hadien ini, neiliang u Montri wa pait yaka chnat i chait i khiah, u AL Hek uwa man leh u MLA katai ka thaw deilang wa u DHS, Dr. Aman War da lai li sylli wei da phah ya kitai kiwa sah ha kitai ki yung wym toh u mih ki cha lait.
U Montri deilang wa u DHS da pynman ki leh yaka yalang wa tbian ha Community Hall yong ka chnong, wow yada na kiwon kiwon ki maa ya kiwa chong chnong.
U AL Hek da pyntip u wa napyrdi kitai ki manyung, uwi toh uwa da dep chim yaka nongmuna wei da chem wa em u ya u khñiang COVID-19, neibhah wa man u napyrdi ki 41 ngut kiwa lai khawai bia, katwa ya kiwi kiwa em ha katai ka yung da chim ya ki nongmuna wow phah pait biang.
