Ka KSU Lapangap Unit da pynsñiaw ko yei khyrngiat wei lyngngoh ha i jooh i por beiñ joor ko leh ya waroh ki MDC ka Jaiñtia Hills Autonomous District Council khamtam yaka EC yong ka JHADC hajrong i kyntait yong ka wow chim ya i bahkhlieh ya i ya kajia khappood hapyrdi ka jylla Meghalaya wa Assam.
Ya ini ka seiñ da kdaw ko yeiwa klam u EM ka JHADC u Finely Bareh uwa da jubab yeiwa kylli wa da booh da u MDC ka thaaiñ u Dawan Lyngdoh haka dorbar tlang kawa dang dep uwa da ong wa ki kaam khappood toh i kaam ka sorkar jylla.
Kamtæ ka seiñ da ong ko wa ini i leh ka JHADC da pynpoh ko ya ki paaid chong chnong kiwa em cha khappood kiwa em hapyrdi i yaleh wa ka Assam kiwa da man kamwa chah kyntait. Deiwa kylli leh wa ini mut wa ka Lapangap-Khanduli baam ki armaloi?
Da pynkynmoo wa ka Lapangap wa Khanduli ym em baam armaloi ki wa na Assam. Lada chah kyntait ki ini mut wa kitu ki Land Holding Certificate (LHC) wa Pata Hali wa ksoh kiwa chong chnong ka Lapangap wa Khanduli ym em yukheiñ ki mo ha JHADC?
Hawa kamni bha wow ong ki wa ym tip aiñ ki wei toh leh kiwa biej wei na ini i daw da pynman ya ki wow kyntait ya ki chnong khappood heiwa hei yongsakhiat kam ki MDC wa em bor wow chna yaki aiñ, toh u pynskem yaki aiñ yada ki thaw ki bhaw wa i khyndaw i chyiap, toh u sarom ki wa ym nood ki wow mih madan tang chisien leh cha kini ki thaw wa em kajia.
Da kdaw leh wa u CEM yong ka Karbi Anglong Autonomous Council dei yong oo da wan pait u hadien wa pynsangeh ka KSU ya u sarok wa chna ka Assam hapoh u pood yong ka chnong Lapangap wei da chimkhia u wut wut wow yachem ya u DC ka West Jaiñtia Hills, tangwa ki MDC yong i won suki hi-eh ki yoo la kam kiwa baam tulop hi-eh wei kiwa pynemkaam bakla ya ki Scheme paidbah, da pynbaad ka seiñ.
Chooh chooh da ong wa ym toh wow khut pynjemdaw yaka Lapangap-Khanduli kam ki “Border Area” neibhah ym em lai knieh ki ya i thaw yong ka Assam wei toh ka Assam wa wan kyntoor pood cha Meghalaya.
Kamtæ da beiñ joor leh ya u CEM ka JHADC u wym em i kitklieh iyi iyi leh yei yong oo, da pynkut deiwa ong wa ini da jia neidaw wa da synchaar da ki biej ya kiwa stat wei da kylli leh wa lada ka Lapangap ym em mo haap ko hapoh ka Elaka Shilliang Myntang?
