Ynñiaw ngut ki bru da dooh ki yei mynsien ki hadien wa khih u khmi wa khlanbor 7.4 ha ka Richter Scale ynne i step ha Taiwan hadooh wa da pynbna ya ki Tsunami Warning neibynta ka ri Japan wa Philippines tangwa da embhah ym em jia iyi iyi ya kini ki ri.
Uni u khmi toh uwa da khih kamwa 7:58 i step heipor yong kani ka ri wei da sdang najan ka chnong Hualien hei jngai wa 18 Km wei uwa yillu 34.8 Km chapoh khyndaw. Hadien wa khih uni da bood sa kiwi ki khmi wa rap duna bor.
Kiwa mynsoo da antaad wa da em ki 730 ngut wei kiwa sahkut wa chah ban kiwa dang thooh da em ki 77 ngut.
Na kiwa yap waroh toh kiwa em hapoh ka Hualien County wei i joor dooh iwa chah ktah toh ha kani hi ka thaaiñ heiwa da em ki yung wa boon mala wa da oor wei da dooh bordiñ leh boon hajar tylli ki yung neidaw oor khyndaw wa ki moo.
Uwa e ktien ka Taiwan Central Weather Administration da ong u wa ye u khih chooh chooh u khmi wa joor hadooh wa kut kani ka tayaaw.
Uni u khmi wa joor kamni toh uwa da khih hadien 25 snem heiwa u snem 1999 da khih uwa khlanbor 7.7 ha ki bynta ka South Taipei, Taiwan heiwa da yap 2,400 ngut ki bru wei kiwa mynsoo da em ki 10,000 ngut.
Discussion about this post