U Symbood Montri Rangbah ka jylla, u Prestone Tynsong da ong u wa da khim ware i por wow yachem wa u Montri ki Kaam Pohyung ka ri India, u Amit Shah yow yaklam ya ki phang wa sahteiñ yong ka jylla, kiwa kynthup yei dawa pynkrehkaam yaka Inner Line Permit (ILP) wei wow tipmit noh ya ka ktien Khasi hapoh 8th Schedule.
U Amit Shah uwa man u Chairman yong ka North Eastern Council (NEC) daw wan poi u ha Shillong mynstep ka sngi yow wai yaka Plenary Meeting yong ka NEC ka wow sdang haka 19 tarik uni u bnai ha Shillong, wei ha kani ka yalang daw wan chimbynta leh da ki Montri Rangbah wa ki Lat yong ki jylla ka thaaiñ North East waroh kawi, najrong kiwi ki Montri ka sorkar pyrdi wa ki sahep sorkar.
Hawa kylli, u Prestone da khana u wa u Amit Shah daw wan poi u mynstep ka 18 tarik heipor janmiet, tangwa kamwa man katni, i por da khim palat neibhah wa ynne ka sngi ka President dang mih wot ko na Shillong, wei ka sorkar ym pu yoh ko wow yaklam hajrong ini, tangwa da pynrap u wa hanla kattæ leh daw pyrchang wow pyrkhat kammon u yoh laad.
U Symbood Montri Rangbah da ong chooh chooh u wa ka sorkar da jooh yaklam ko neipor cheipor ya ki phang wa sahteiñ ka jylla nadooh ha u Montri Rangbahdooh, u Narendra Modi næ ha u Amit Shah ha Delhi.
Discussion about this post