Kamwa 12 ngut ki bru da dooh ki yei mynsien yong ki hadien waka lieñsuiñ wa kamai wa em 100 ngut ki bru haka da haap ko na suiñ du hadien kattu katni por wa hær ko na Kazakhstan wei da tyrrah ko ha iwi i yung manda manda poi ko cha sla pyrthai tangwa boon da lait im kiwa em hapoh yong ka.
Kani ka lieñsuiñ kawa la 23 snem wa pynemkaam daka Bek Air da khliah ko ha ki arbynta heiwa i khmut da tyrrah i ha iwi i yung.
Kani ka lieñsuiñ da hær na Almaty heipor 7:05 i step (01:05 GMT) yow lai cha nongbah Nur-Sultan deilang wa 95 ngut ki Passenger wa 5 ngut kiwa pynlai yaka lieñsuiñ.
Ka Kazakhstan da phah dam ko ya waroh kini ki jait lieñsuiñ (Fokker Model) wow hær ki iwa man leh waroh ki lieñsuiñ wa pynemkaam Bek Air wei da phah pynman yaka takit.
Da mynsoo 53 ngut, 9 ngut toh ki khynnah wei 10 ngut ki waheh da mynsoo joor ki.
U Deputy Prime Minister u Roman Sklyar da pyntip u wa i tdong ka lieñsuiñ da tyngkhooh khyndaw i arsien heipor wa dang mut ko wow hær noh wei ym pu tip neiyi i daw.
“Ka lieñsuiñ khliah ko arbynta wei kiwa boon kiwa khlaad toh kiwa em hakhmat.” Da ong u.
Ym em bru hapoh i yung wa tyrrah kani ka lieñsuiñ.
Kani ka jait lieñsuiñ ka Fokker 100 Model toh kawa ym em de wa pynmih thymme katni wei ka Bek Air toh kawa nyngkong na Kazakhstan wow sdang yaka Low-Cost Airline.
Discussion about this post