Khlaad 12 ngut kiwa lai baam doh hadien wa tyrrah ka Bus ki wa kawi ka Truck

12 ngut ki bru da khlaad ki hei ya tyrrah ka Bus wa lai luti ki wa kawi ka Truck ha Dergaon iwa man i chnong wa em ha Golaghat District ka Assam iwa da jia ynne i step.

Kani ka Bus toh kawa kit ya 45 ngut ki bru wa lai baam doh wei da tyrrah ko ya kani ka Truck mar dei khmat heiwa kani ka Bus da pra ko phrai wei na kiwa yap san ngut toh ki kynthai wa uwi u khynnah khian katwa kiwa mynsoo da em ki palat 20 ngut.

Ini i ya tyrrah kari da jia i ha u NH-37 heipor kamwa 5:00 waje i step wei ka Truck Dumper toh kawa kit mooyong kawa wan neiliang Tinsukia yow lai cha Golaghat wei i thaw wa jia ini i tyrrah toh ha i thaw wa tip kam i Balijan.

Waroh ar kiwa kari da khlaad pyn ha ini i thaw wa jia katwa ya kiwa mynsoo da kit cha ka Dergaon Civil Hospital wei ya kiwa mynsoo joor da kit cha Jorhat Medical College & Hospital (JMCH).

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kini kiwa lai baam doh da mih ki nei chnong ki heipor 3:00 waje i step yow lai cha Tilinga Mandir dep neitæ yow lai baam doh ha Bogibeel.

I daw wa jia ini toh neidaw wa kani ka Truck da phah lai ka cha u luti wa wan ki kari mar pyrchah neibhah wa em i pynchna ya chiliang uni u sarok wei heini i por leh joor u ly’oh kamtæ kani ka Bus da tyrrah ko ya kani ka Truck.

Neiliang kiwa chong chnong da beiñ ki yeini rukom kreh sarok khlem da biang i pynkhreh ki laad yada wei ym em leh ki bru wa pait yei rukom pynlai kari wei wow pynsangeh kari neibhah da lai lang waroh ki kari heijooh i por.