Jowai: Hadooh 15 ngut ki bru da dooh ki yei mynsien yong ki wa kyntup ya 4 ngut ki khynnah ynne i step ka 29 tatik hadien wa iwi i chram da oor i ha i thaw wa dang chna yung wa em haka chnong Pune ha i bynta wa tip kam i Kondhwa.
Waroh ki 15 ngut kiwa khlaad toh kiwa kreh mylla ha kani ka thaw kiwa sah leh pyn ha kani ka thaw wa dang chna yung kawa em hajan ka Talab Masjid.
Neiliang u Maharashtra Chief Minister u Devendra Fadnavis da phah pynman u yaka takit wei da pynbna u T. 4 lakh cha kiwa emyatoh kiwa khlaad.
Ini da jia i hadien wa joor u slap wei da ye u sai im ya le ngut ki bru kiwa mynsoo wei da kit yaki cha ki thaw sumaar. Da pynmih leh yaka hukum wow pynsangeh chwa yei kreh ha kani ka thaw.
Kiwa khlaad boon toh naka jylla Bihar wei da kem leh ya ki arngut heiyatoh wa kani ka kaam wei da e FIR pyrchah yaki 8 ngut.
San bnai nachwa kiwa chong hajan kani ka thaw da pyntip ki cha kiwa chna yung wa ini i chram ym em bait i wei da noh i chakhmat.
Neiliang u CM ka Bihar da pynbna u wow su T. 2 lak cha kiwa chah ktah na ini wa jia.
Discussion about this post