I kajia pood hapyrdi ka India wa ka China ha ki kattu katni ki bynta ka Union Terriroty ka Ladakh da neh i kattu la kamwa 2-3 bnai wei ha kini ki tayaw wa dadep da em i yaklam hapyrdi ki heh chipai wa ki heh sorkar ki ar ri wow pynbait yeini khnang wow wanrah yei chongsuk.
Ini i chongsuk da man i iwa lai bait tangwa ynnin syndet syndet da mih biang i awri i yachoh yadat hapyrdi ki chipai yong ki ar ri ha Galwan Valley ha Ladakh heiwa da khlaad 3 ngut ki chipai ka India wei da kam leh wa da khlaad kamwa 5 ngut ki chipai ka China.
Ynne i miet won katkam ki yutip wa da yoh, neiliang ka Indian Army da pyntikna ko wa da khlaad hadooh 20 ngut ki chipai yong ka ha ini i awri wei kiwa khlaad ye ki wow ku kat dang yoh yutip chooh chooh.
Chooh chooh ki yutip wa da yoh da ong wa ki chipai ka People Liberation Army (China) da dooh ko ya ki 43 ngut ki chipai yong ka wei em leh boon ngut kiwa da mynsoo ha ini i awri ha khappood ha Galwan Valley.
Hadooh wa pynmih ya kani ka Wyrta ympu ye ware u tip yei daw wa khlaad ki chipai ka Indian Army lada toh neidaw wa nei yachoh namo wa haap wa oor ki cha synrang namo wa yap ki neidaw wa chah siat ki mo.
Ynne ka sngi ki heh chipai ka China kiwa pait ya ka thaaiñ sepsngi da kam ki wa ini waroh da jia i neidaw wa kyntoor pood ki chipai ka India, katwa neiliang ka Ministry of External Affairs ka India won da pynche ko wa ini da jia i neidaw wa wan psiah wei wan pynyoo bor ki chipai ka PLA chapoh u pood u ang ka India.
Neiliang u Wyrta daw pyntip chooh chooh i cha phi heiyatoh wa ini i jia ha khappood waroh kat dang mih ki sngi.
