I joor u slap wa ka la’ær ha ki kajiak sngi wa dadep da wanrah i ya ki jia wa sñiawsih wa har rukom ha kylleiñ ka jylla, khamtam ha ri-loom Khasi wa Jaiñtia heiwa da dooh leh ya ki mynsien bru.
U Montri ka chnat Disaster Management, u Kyrmen Shylla da pyntip u wa u slap wa ka la’ær da joor bha i ha ka 13 wa 16 tarik, heiwa da boon kiwa da chah ktah. Da pyntip u wa katkam ka yutip wa da yoh ka chnat, da em 3 ngut kiwa da khlaad, heiwa 2 ngut toh na East Khasi Hills wa 1 na Ri-Bhoi District.
U Montri da phah u leh ya i sñiawlem cha ki manyung kini ki 3 ngut deiwa pynrap wa neiliang ka chnat daw pynsmat ko katwa ye wow phah yarap ya iwa da mang na ka sorkar.
Heijooh i por, da ong u wa da sakhi leh yei oor ki sarok, ki loom wa i yap ki mrad. Da kyntu u leh ya kiwa chong chnong ka jylla wow man kiwa syndong kam ha kini ki por.
Katkam wa pyntip u Kyrmen, ha kini ki kajiak sngi i oor wa i chah ktah da rap joor i ha East Khasi Hills wa ha Ri-Bhoi District, katwa cha kiwi ki District ympu yoh yukheiñ lut ya iwa chah ktah.
