Ynne i step da jia iwa sñiawsih ya kawi ka manyung heiwa ki 8 ngut na Kerala wa kynthup ya ki 4 ngut ki khynnah da dooh ki yei mynsien yong ki hapyrdi wa lai chuti ki cha Nepal wei heipor wa khreh liwan noh ki cha Kerala, India.
Ini da jia i ha Everest Panorama Resort kawa em ha Thaha Municipality, Makawanpur District, Nepal.
Ya kini ki 8 ngut da chem wa thiah yaplær ki ynne i step ha i kamra wa sah ki wei da pynkit ya ki wut-wut cha HAMS Hospital, Dhumbarahi, Kathmandu da ki lieñsuiñ niangkachiah heiwa da pynbna wa da khlaad ki chwa wow poi kani ka thaw sumaar.
Ya kini kiwa da khlaad da tip kam u Prabhin Kumar Nair (39 snem), Sharanya (34 snem), Renjith Kumar T B (39 snem), Indu Renjith (34 snem) wa ki khon yong ki, ka Sreebhadra (9 snem), Abhinav Soorya (9 snem), Abhi Nair (7 snem) wa u Vaishnav Renjith (2 snem).
Kini ki 8 ngut toh kiwa na Chenkottukonam (najan ka Chempazhanthi) Thiruvananthapuram wa kiwa na Kunnamangalam, Kozhikode ka jylla Kerala.
Kini kiwa khlaad na Kerala da lai ki cha Pokhara, Nepal chirup wa ki 15 ngut kiwi tawon wei da sah ki ha iwi donhi i kamra. Da ong wa neidaw wa wan ki na ki thaw wa chit cha ki ri-loom wa kjam khamtam heini i por tlang da pynemkaam noh ki ya kawi ka Room Gas Heater kawa heh wow pynchit ya i kamra yong ki.
Ya kini ki 8 ngut da chem hadien wa kiwi tawon kiwa lai lang wa ki da lai kyrsu ki ya ki (8 ngut) ha ka kamra wa sah ki ynne i step wei da chem wa waroh da yaplær ki neidaw wa riñ mynsien ki ya ka la-ær wa mih na ka Gas Heater.
Discussion about this post