Shillong: I khonboo yong ka manbei naka chnong Mawlai Mawtawar da khlaad noh i ha kpoh yong ka bei du neidaw wa slem ki wakreh ka Ganesh Das Hospital wow sumaar. Wei i daw yong i pynslem e sumaar ya kani ka manbei wa tip pyrtuid kam ka Iban Umdor toh neidaw wa sah ko haka chnong wa da pynhaap hapoh ka Containment Zone wa em kiwa chong chnong kiwa yoh ya u COVID-19.
Katkam i pyntip yong kiwa hayung hasem da ong wa ya kani ka manbei da yah cha Ganesh Das Hospital nadooh i por step, tangwa ki wakreh yong katai ka Hospital da phah noh ki yaka cha kiwi ki Hospital heiwa kini ki Hospital leh ym em e ki yei sumaar. Du hadien wa tuklar ka HYC Mawlai Circle, ki bor pynlai katai ka Hospital da bien ki wow e thaw heipor kamwa 3 waje, tangwa heipor miet da pyntip wa ym ye de wow ksoh yei tai i khonboo.
U President ka HYC Mawlai, u Donboklang Kharlyngdoh da beiñ u ya ini i ieh beiñ ki wakreh katai ka Hospital sorkar ya kiwa kjut kiwa wan na ki Containment Zone, wei dawa u leh wa ka sorkar toh u pynchitom ko yaki wakreh kiwa man i daw yong ki wa dooh noh yei khonboo. Da ong u wa ka sorkar toh u jubab ko wa ileh waki wakreh yong katai ka Hospital da kyntait ki wow pdiang ya kiwa kjut wa wan naki thaw wa em kiwa chah ktah haka khlam COVID-19, heiwa neiliang ka sorkar da maham ko ya kiwon kiwon ki Hospital wa kyntait wow sumaar ya kiwa kjut wa chitom.
Hajrong i ong u DHS wa duna ki thaw thiah hapoh Isolation Ward neibynta kiwa kjut wa wan na ki thaw wa chah ktah kiwa haap wow booh hapoh ki thaw wa kyrpang, u Kharlyngdoh da ong u waroh kiwa kjut toh u lai chwa ki cha ka Isolation Ward, tangwa iwa sñiawsih wa du chi pyntip wa wan na Mawtawar ym chim de wot wow pait yaki kot ki sla wei da ong bait wa ym em thaw thiah, deiwa pynrap wa ym toh wa ym em thaw thiah wei toh wa kyntait bait wow sumaar.
Da ong u wa ka sorkar toh u leh ko iyi re iyi hajrong i dooh noh ya i khonboo neibhah na i por cha i por ki wakreh kani ka Hospital da klam ki da ki kyntien wa ktah ya kiwa kjut.
