Shillong: Ynne ka sngi ka wi ka Auto Rikshaw da noh ko cha synrang neidaw wa khlem akor kiwa thyllem dieñ ha ka chnong Mawlyndep Ri-Bhoi District, kawa haap hapoh Umiam Police Station, wei ha ini i jia ka wi ka manbei da dooh ko yei mynsien yong ka wei da mynsoo hadooh 6 ngut kiwa kynthup ya ki 3 ngut ki khynnah khian kiwa naka jooh ka yung na ka chnong Pyndengnongbri, Mairang.
Ini da jia i heipor 2:30 nohchariñ ka sngi heiwa ka manbei wa tip kam ka Arbina Ryntathiang da khlaad ko ha Holly Cross Health Centre kawa em ha Umsaw Khwan, Ri-Bhoi district. Ya kiwa mynsoo da tip pyrtuid kam ka Ibaphylla Ryntathiang, ka Batimila Ryntathiang (30), u Shanborlang Ryntathiang (19), u Mewanbanshan Ryntathiang (5), u Samebanteiskhem Ryntathiang (3) wa u Ericson Ryntathiang uwa dang 2 snem duna.
Katkam wa pyntip kiwa mynsoo da ong wa ini da jia i waroh wa khlem akor kiwa thyllem dieñ ha iwi i thaw hadooh wa uwi u dieñ da tyllung u cha sarok wei da toh u ha ka auto wei uni u sarok em u hapyrdi i chariñ loom kani ka auto da noh ko cha synrang.
Iwa sñiaw phylla toh wa hadien wa haap kani ka Auto cha synrang kiwa pam dieñ hei thaw wow yarap ki da yut ki na kani ka thaw.
Hadien kattu katni por neiliang kiwa chong chnong ka Mawlyndep da lai yarap ki ya kiwa chitom wei da kit ya ki cha ka Holy Cross Health Centre, tangwa neidaw wa joor i mynsoo ka Arbina da khlaad noh ko wei ya kiwa mynsoo da kit won ya ki cha ka Shillong Civil Hospital yow yoh sumaar ki.
Ki pulit dang pynman ki ka takit hei yatoh wa ini waroh.
Discussion about this post