U khloor yakob phet ka ri India, u Milkha Singh uwa da dap 91 snem i rta da khlaad noh u ynne i miet neidaw u COVID-19 ha kawi na ki thaw sumaar ka sorbah Chandigarh, Punjab.
Ya u Milkha uwa jooh man leh kam u chipai ka Indian Army da khut sin leh ya oo kam u ‘Flying Sikh’, hadien wa man u kam uwi na ki bru wa smat dooh u phet ha ki yakob 200 wa 400 meter wei da jooh jop u leh ya ka takma ksiar ha ka 400m ha ka Asian Games wa ka Commonwealth Games.
U Milkha da jooh rah naam u leh ya ka ri ha ka yakob phet deiwa yoh hadooh soo tylli ki takma ksiar ya ka India ha ka Asian Games ha ka 200 metre wa 400 metre ha u snem 1958 Tokyo Asiad.
30 sngi hadien wa yoh COVID-19 u wei 5 sngi hadien wa ka kurim u ka Nirmal Kaur leh khlaad ko nei chah ktah ha u COVID-19, kiwa ha yung u Milkha Singh da pynbna ki wa da khlaad u heipor 11:30 i miet ka 18 tarik.
Neiliang ka Hospital wa sumaar ya oo ka Post Graduate Institute of Medical Education & Research da pyntip ki wa da sumaar ya oo hadooh ka 13 tarik uni u bnai heiwa da Test wa da man Negative u na u COVID-19 tangwa hadien wa lait u na u COVID-19 da wan biang i chitom heiwa da booh biang ya oo hapoh ka ICU.
U Mikha Singh da yoh COVID-19 u ha ka 20 Naisan hadien uwi man ki wakreh ha yung u da yoh u ya uni u khñiang wei da kit nyngkong ya oo ha kawi ka thaw sumaar ki bru samen wa em ha Mohali.
Neiliang u Prime Minister Narendra Modi leh da phah u ya ki kyntien sñiawlem deiwa yaroh ya u Milkha Singh deiwa ong wa da e mynsien u ya ka ri da ki moomær wa da poi u ha ki kaam wa da leh u.
“Dang dep yaklam wot O wa u Milkha Singh ha kini ki sngi wa dep tangwa ym tip O toh i khaddooh. Boon kiwa yalehke da yoh bor ki na i lai luti u,” da ong u Modi.
U Milkha Singh da dep yoh u leh yei naam Padma Shri Aawrd ha u snem 1959.
Da yoh takma ksiar u leh ha ki lympung yakob wa kynthup ya kini hawah:
| S. No | Medal | Event | Category |
| 1 | Gold | 1958 Asian Games | 200 M |
| 2 | Gold | 1958 Asian Games | 400 M |
| 3 | Gold | 1958 Commonwealth Games | 440 Yards |
| 4 | Gold | 1962 Asian Games | 400 M |
| 5 | Gold | 1962 Asian Games | 4X400 M Relay |
| 6 | Silver | 1964 Calcutta National Games | 400 M |
