U Kwostarming Lapasam wa chong wa sah ha Sohkymphor Pohshnong, East Jaiñtia Hills District uwa man leh u Waheh Chnong ka Sohkymphor Pohshnong uwa kattae la duna 3 snem kattu, da khlaad noh u ynne i step ka 14 tarik heipor 4:00 waje ha yung sah yong oo hi ha Sohkymphor Pohshnong.
Da jooh ksoh u leh kam u Waheh Chnong ka yurim Khlieh Chnong (Lum-Mulieh) kamwa 15 snem lynter nadooh u snem 2001-2016 kamwa 5 sien katkam ka yutip wa da yoh na u Treilang Suchiang, u Waheh Chnong wa kattae ka yurim Khlieh Chnong.
Haka chakri yong oo kam u pa yong ka chnong da leh u chiboon ki kaam wa bha haka imlang sahlang liang wanang. Man u leh u bru wa em i kitkhlieh (Responsibility) haki kaam ki jaam. Man u leh u bru wa jemnood wa jai-jai, wa sbun wa smat wow e yarap cha ki lok ki jor, em ha oo ka mynsien wa man salonsar khlem da kheiñ ya ki heh ki khian.
Da khlaad u haka rata kawa 48 snem, wei da ieh u chadien yaka kurim wa 6 ngut ki khon, 4 ngut ki payu wa ki ksu. Yaka lehniam wa khaddooh u pyndep mynstep ka sngi 15 tarik na yung chong yong oo ka wow sdang heipor 12:30 i pyrdi sngi. Yaka met wa dang sah daw tlep emburom ha u Loom Tlep-bru ka Balang Presbyterian Sohkymphor Pohmission, pynkut ka kyrwoh Wyrta na u R.H. Phawa uwa man u paralok wa maya yong u K. Lapasam.
Laisuk Pakha wa Maya
Baam Kwai ha Dwar u Blai
Chongsuk ha Tyngkong u Kynrad
Ksan ñia ksang chang ya kiwa ha yung ha sem, ki lok ki jor, ki kur ki kha, ka chnong ka thaw, Balang kamjooh leh yaka Synjuk Waheh Chnong East Jaiñtia Hills District wa yaka Synjuk Waheh Chnong Ri Jaiñtia.
