Ka Seiñ Kur Dkhar Central Body, Jaiñtia Hills dap ko dei sñiawsih wa khroo heiwa da khlaad noh u President yong ka, u Woh Ksohbok Dkhar ynnin ka sngi 21 tarik.
U Woh Bok kamwa jooh khut maya ya oo da man u uwi na kiwa sdang ya ka Seiñ Kur Dkhar ha u snem 1999, neitæ da man u kam u Vice-President ha uni u snem, da man u leh kam u President nadooh u snem 2011 hadooh ka sngi wa khlaad u na kani ka pyrthai.
Kam u President chiboon ki kaam da leh u hapoh ka kur hei wow pynlum pynlang ya ki para kur para jait ha kylleiñ ka Ri Jaiñtia.
Hapoh i yahkhmat yong oo kam u President chiboon ki Circle ki Unit wa da yoh u pynskem hapoh ka Seiñ Kur wei i khlaad yong oo man i i dooh iwa khroo ya ka Kur waroh kawi.
Tæ kam ka Seiñ Kur hi waroh kawi booh ko i ngooh i dem neibynta ki khon ki ksu, kiwa hayung hasem yong u Woh Bok u yoh ki dei chait dei tram u roi parum pareh, kamjooh leh ya ka Seiñ Kur u nang ku ko na ki por cha ki por.
