U Rev. Peace Arrowsmith Challam uwa khut maya kam u Pastor Smith da khlaad noh u ynne i sngi ka 20 tarik ha Shillong heipor kamwa 1:30 wei yeiwa dang sah i yong oo da pynthiah ha Mawlai, Nongkwar ha yung wa sah u.
Ya u Pastor Smith da kha ha ka 25-01-1939 wei toh u khon u (L) J.P. Lyngdoh (uwa jooh man kam u Tymmen Wasan ka Balang Presbyterian Jowai) waka (L) L. Challam wei ka kurim u toh ka Kong Qiorimai Giri Decruze.
Ha u snem 1959 heipor wa dang lai puræ B.A. u ha Union Christian College kawa em ha Umiam da sñiaw u yei khut u Blai yow lai yalap yaka Gospel kamtæ da ieh u yei puræ puthi yow lai yalap wa arngut ki para wa ngait cha kylleiñ ki chnong ka Ri Khasi Jaiñtia, cha Ri Lyngngam, Mikir wa Cachar.
Da man u kam u Pro Pastor nadooh u 1967 ha ka District Jowai, Jowai Ri-War hadien wa pyndep u yei puræ Theology (LTh) ha uni hi u snem na Sohra.
Da man u kam u Ordained Pastor ha ka Synod kawa da pynman ha Balang Nongsawlia, Sohra Presbytery ha u snem 1973 wei da man u kam u Pastor ka Balang Presbyterian Jowai hadooh wa chong ngiah u ha u snem 1997 neidaw wym em chait u.
U Pastor P.A. Challam da jooh ma u leh kam u Adviser ka Jingiaseng Kynthei Balang Jowai, u Adviser Temperance ka Jingiaseng Kynthei Jowai Ri-War Presbytery najrong wa jooh man u kam Secretary yoh ka Jowai Ri-War Presbytery wa kiwi kiwi de ki kaam wa ksoh u.
Ya ka niam ka rukom wa khaddooh u Rev. Peace Arrowsmith Challam u pyndep ha ka 22-07-23 heipor 1:30 i sngi ha loom tlep-bru ka Balang Presbyterian Mawlai Nongkwar.
Discussion about this post