U Woh Chaimon Pyrbot, uwi na ki wa heh dooh jan ha chong Jowai yong i, da khlaad u ha i r’ta iwa 105 snem ynne i step ha Yung Blai yong oo ha Loompyrdi Iongpiah, Jowai.
Ya i pyndep ya ka niam thang niam riñ yong oo u pyndep ha ka 12-08-2021 heipor 10:00 waje i step ha Khnap Thang-bru ha Khimmusniang, Jowai.
Ka Loompyrdi Iongpiah pynsñiaw ko yei mynsien iwa diaw yei khlaad noh yong u Woh Chaimon Pyrbot.
U Woh Chaimon Pyrbot toh da man u u Khai u Piar u Chrot Skit yong ka loom ka pdeiñ yong i. Man uwa yahluti wow man i kiwa tipbru tipblai kiwa tip wei sñiawthooh wow burom u makhane yei yong i da hi nadooh ka niam ka rukom ki dustur ki riti-ka rwai ka siaw.
Oo man u uwi na kiwa sneiñ pynyoo na ki 3(le) ngut ki waheh heiwa ka Khynroo khyllood Committee ka Seiñraij Jowai da ye ko u pynmih ya ka Kot Niamtre Ka Bei Seiñraij 1991 wa ha u 1992. Man u, uwa thoh sur uwa nep jabieñ heiwa ki kyntien sur yong oo chat ki ya ki yumut kiwa jngai. Man u uwa tem Harmony uwa pliah wei em u ka sap choh bom wa i rukom choh bom yong oo phær i, wei tip boon rukom. Man haroh u uwa thoh Drama uwa pnah.
Chiboon ki kaam yong oo ha ka imlang sahlang yong i, ym ye de wow niawliar.
Hanlada i rta yong oo man i iwa da ih bha, iwa da yoh u ya katæ ka rta wa chong prah chong chang wa par kyrsu khawah. Kam ki khon ka Loompyrdi Iongpiah won sñiaw iwa i dooh noh noh i ya oo, pynthylli ko ya i mynsien yong uwi pa uwi kawi pa kawi ki khon ka dong.
Han kattæ i leh, kam ki bru hap won i u chaniah hei bor wa stat u Kynrad.
Lai Suk Woh Chaimon.
Ka Loompyrdi Iongpiah phah ko ya kani ka khubor ood ka khubor naam cha kiwa ha yung ha sem yong oo nadooh ki pyrsa ki ksu kur hadooh ki khon ki ksu yong oo.
Na u R. L Bimee Suwer, General Secretary, Loompyrdi Iongpiah.
