Heiyatoh wa i kylla ka kari ki bru wa kreh Election iwa da jia ha ka 25 tarik uni u bnai ha West Garo Hills, uwi na kiwa da mynsoo uwa man kam u 2nd Polling Officer uwa tip kam u Chesan Ch Marak da khlaad noh u hei step ka 26 tarik heipor wa dang kit ya oo cha thaw sumaar wa em ha Assam.
Katkam wa pyntip u SP ka West Garo Hills, ini i kylla ka kari ki da jia i ha chnong Photamati heiwa da mih ki na Tura deiwa lyngba ka chnong Bajengdoba wei waroh da em 8 ngut hapoh kani ka kari.
Mar ya tip yeini, ki pulit ka Tikrikilla Police Station deilang wa ki chipai ka BSF wa FST da lai ki wut wut cha ini i thaw wa jia wei da kit ya waroh ki 8 ngut kiwa mynsoo cha Tikrikilla PHC yow yoh yei sumaar tangwa u Chesan neidaw wa mynsoo joor u hei bynta i khlieh wa i durkhmat da phah kit ya oo cha Critical Care Hospital wa em ha Goalpara, Assam tangwa heipor wa kit ya oo cha kani ka thaw sumaar da khlaad noh u ha luti.
Kiwi won ki 3 ngut kiwa da kit cha kani hi ka Hospital dang em ki hei pait ki Doctor katwa kiwi ki 4 ngut kiwa em ha Trikilla PHC da yoh ki wow mih noh.
Da pyntip leh wa u bru wa yah ya kani ka kari da yut u na ini i thaw wa jia wei ki pulit dang thooh ki oo.
Neiliang ka Election Department ka jylla Meghalaya da pynbna ko ya ka poisa yarap kawa T. 15 lak cha kiwa ha-yung uwa yap.
Puræ leh: Kylla ka kari kiwa lai kreh Election mynsoo joor uwi
