Jowai: Ynne ka sngi sa arngut chipayu da khlaad noh ki ha NEIGRIHMS, Shillong neidaw wa chitom joor hadien i baam tit wada jia ha chnong Lamin, West Jaiñtia Hills District haka sngi Wednesday waka sngi Thursday ka tayaw wa da dep.
Kini ki arngut kynthup yaka Synran Khonglah 16 snem kawa da khlaad heipor 3:30 PM wa u payu yong ka u Lapynshai Khonglah 28 snem uwa da khlaad heipor 7:30 ynne i miet. Kini waroh arngut toh kiwa dang kyrriah ynnin ka sngi na Jowai cha NEIGRIMHS deilang wa u payu arbei yong ki u Amstrong Khonglah neidaw i chitom joor tangwa sihbhah kini arngut da khlaad noh ki.
Hadooh kamwa man kattæ, naki 18 ngut ki le tylli ki manyung wa yoh kjut neiwa baam tit ha katai ka chnong, kiwa da khlad da em ki 4 ngut kattu, 2 ngut toh kiwa khlad haka sngi Sunday katwa ka Synran Khonglah wa u Lapynshai Khonglah da khlaad ki ynne.
6 ngut won na pyrdi kini toh da chait ki hadien wa chah sumaar katwa 9 ngut hadooh kamwa man kattæ dang em ki hapyrdi i chah sumaar haki thaw e sumaar wa em ha Jowai wa ha Shillong.
Discussion about this post