Katkam ka yutip wa da yoh da em sa uwi wa khlaad ha i tyrrah kari ha Tuber Chohchrieh, East Jaiñtia Hills iwa da jia ynnin i miet, hawa kini ki bru kiwa na chnong Mynso A, West Jaiñtia Hills da wan thung kba ki na Samasi wei ka kari Puck-up (kawa ym em number) wa chong ki wow liwan chnong da lut phniang ko wei kiwa chong ha ka kari da hiar ki wow ngiat ya ka.
Da ong wa heipor wa ngiat ki ka da em kawi ka truck kawa wan na liang Ladrymbai kawa em Number AS-01LC-6357 da tyrrah ko ya kani ka Pick-up wa ki bru wa ngiat ya ka heiwa da khlaad noh 5 ngut pyn ha i thaw wa jia katwa sa uwi won da khlaad u ha thaw sumaar (waroh kiwa da khlaad da em ki 6 ngut).
Kiwa mynsoo waroh da em ki 8 ngut heiwa 5 ngut da chah dang chah sumaar ki ha Ialong Civil Hospital wa ha Woodland WK Hospital, Sabahmuswang, wei ar ngut won da pynkit noh cha Shillong.
Katkam ka yutip da ong wa uwa yah ya kani ka truck da yut u na ini i thaw wa jia.
