Ka manyung wa em le ngut wa uwi u khynnah khian da dooh ki yei mynsien hadien wa oor khyndaw ha ki ar thaw ha ri-loom Garo ynne i step.
Ki le ngut wa chi yung da yap ki hadien wa oor khyndaw ha i yung wa sah ki ha Gambegre Block ka West Garo Hills katwa uwi won u khynnah uwa ar snem chiteiñ da dooh u yei mynsien nei oor khyndaw ha thaaiñ Betasing ka South West Garo Hills District.
Ini da jia i hadien wa joor u slap nadooh i miet ka 8 tarik heiwa kini ki chi yung toh kiwa sah ha ka chnong Jebalgre wa em hapoh ka Gambegre Block iwa jngai kamwa 45 km na Tura. Kiwa khlaad da tip kam ka Pritish Marak (bei), u Almost Marak (khon) waka Aianbe Marak (khon) katwa u Sengrik Sangma (pa) wa u Thobias Marak (khon) da lait im ki tangwa da mynsoo joor ki wei dang em ki hei sumaar ha Hospital.
Uwi won u khynnah wa dang ar snem chiteiñ uwa tip kam u Tanush Hajong da dooh u yei mynsien hei oor khyndaw ha chnong Samati wa em ha Betasing Block ha South West Garo Hills heipor 4:00 waje i step.
I joor slap da wanrah i leh yei chlai um ha South West Garo iwa da ktah ya ki yung ki sem kiwa da chah rah chah rong wei da yap leh ki masi wa ri.
