Khlaad syndet u Haniel Syrti uwa yahkhmat ka FKJGP nei haap syndet ka chnat dieñjri

Uwa yahkhmat ka seiñ Federation of Khasi Jaiñtia & Garo People (FKJGP) Lama Unit, u Haniel Syrti uwa ksoh yei kaam kam u General Secretary, da khlaad syndet u neini na sla pyrthai ynne ka sngi ka 4 tarik hei rta wa 24 snem ha Woodland WK Hospital, Sabah Muswang.

U Haniel da khlaad u neiwa jia hei step ka 3 tarik uni u bnai hadien wa syndet syndet da haap kawi ka chnat u dieñjri wa em hapoh chnong Lama heiwa da toh u neibynta i khlieh hadooh wa da mynsoo joor u wei da rah wut wut cha Woodland WK Hospital wei nadooh wa jia ya oo hadooh wa khlaad u ym em de mih ktien u wei da man u leh u wym tip yong bru de.

Kajiak chaphang u khynroo Haniel

Da man u u khonswet khon rangli, da man u u khon phrang sngi wei da pait da yoo u ya ka yung ka sem wei da ieh u chadien ya 5 ngut ki diah yong oo.

Related posts

I sñiawngooh na ka yung ka sem ka Kong Markil Ryngkhlem

November 13, 2024

I sñiawngooh na ka yung ka sem u (L) Chiborlang Suchiang

November 12, 2024

Chooh chooh ha ka kam chakri Blai, u Haniel da man u leh u Rangbah Balang yong ka Balang Presbyterian Lama kamjooh u khynroo wa kit ya ki kaam imlang sahlang hapoh chnong Lama wa ha ki kam Sports wa ki kaam chnong.

Neiliang ka seiñ da ong ko wa i khlaad syndet yong u khynroo Haniel Syrti da man ko i sñiawsih wa khroo ya kiwa ha-yung ha-sem, ya ka Balang, ka chnong ka thaw kamjooh ya ka seiñ waroh kawi wa da dooh ko ya uni uwa yahkhmat khynroo wa tip bru tip Blai, uwa jemnood wa uwa chakri hok ya ka imlang sahlang.

Lyngba kani ka kyrwoh phah ka seiñ ya ka khubor sñiawlem cha kiwa ha-yung ha-sem, ki lok ki jor waroh kiwa emyatoh wa u Haniel Syrti wa u Blai da mon u wow chim cha oo hapyrdi i man khynroo yong oo, yow pyntngen u Tre Kynrad ya waroh kiwa maad yeini i sñiawsih wa khroo.

Khaddooh na ka seiñ ong ko wa dap dei kjut nood yei dooh ya uni uwa yahkhmat uwa u Blai da khut u ya oo hapyrdi i chait i nang khlem poi pyrkhat, ong ka kyrwoh na u D.H. Sumer, General Secretary FKJGP East Jaiñtia Hills District.

“Lai suk khynroo Haniel, kyrkhu kyrdoh na lyndet ya ki diah yong me u yow yoh ki dei nang dei chait.”

Ya ka lehniam wa khaddooh yonh u Haniel u pyndep ha ka 06-08-23 ha loom tlep-bru ka Balang Presbyterian Lama heipor 1:00 waje i sngi.