U Shane Warne, uwa yalehke Cricket wa pawnaam ka Australia uwa yarap ya ka ri u wow jop ya ka World Cup ha u 1999 wei da man u leh kam chibynta ka liang wa jop ya ka Ashes 5 sien da khlaad noh u ynne ka sngi hei rta wa 52.
Ya u Shane Warne da chem ya oo hapoh i yung wa sah u ha Koh Samui, Thailand wei ym ye de wow pynkhai im oo da ki bru wa kreh hei kaam sumaar sukhær. Wei da suba toh wa yoh Heart Attack u.
Ya u Shane Warne da kynmoo ya oo kam u Leg Spinner wa chyrkhei dooh ka Cricket wei da yoh u 708 tylli ki Test Wicket wei da yoh u leh 293 tylli ki Wicket ha ki yalehke One Day International wei da mihkhmat u ya ka Australia ha palat 300 tylli ki yalehke wa boon jait ka Cricket.
Ya u Shane Warne da tipmit ya oo leh kam u Wisden’s Five Cricketers of the Century, da yalehke Cricket u hapyrdi u snem 1992 hadooh u 2007.
Neiliang u khloor yalehke Cricket ka India, u Sachin Tendulkar da pynsñiaw u yei khyrngiat hajrong ini i jia wei da ong u leh u Warne da man u u bru wa ye u pynyatohlok la ha madan næ cha baar madan wei ki nong India leh burom bha ki ya oo.
