Uwi na ki bru wa da pawnaam bha na Ri-loom Jaiñtia, u Ma Obil Kyndait da khlaad syndet u ynne i step synyaw kamwa 2:30 ha i rta wa 76 snem ha Dr. Norman Tunnel Hospital, Jowai.
U Ma Obil da jooh man u kam u MDC hadooh 5 sien cha ka JHADC na Tuber wei da jooh man u leh kam u MLA ka Rymbai Constituency.
I chnong tre yong u Ma Obil toh na Mukhaialong, East Jaiñtia Hills wei da sah u ha Salini Colony, Mihmyntdu chirup wa ka kurim wa 9 ngut ki khon.
U Ma Obil kyndait da jop u ya ka Election MLA ha u snem 1978 na Rymbai Constituency (katni ka Khliehriat Constituency) heiwa da jop u ya u (L) Nihon Ksih, da chah jied u leh 5 sien kam u MDC ka JHADC na Tuber Constituency heiwa da jooh ksoh u leh ya i kyrdan CEM wa Chairman hapoh ka Council.
Wot hadien wa ym em de u chah jied u kam uwa mihkhmat paidbah, u Ma Obil da pteiñ u wow kreh neibynta i bha i miat ka imlang sahlang ha kiwa boon ki bynta ha ka Seiñkur Bahkhla wa ha kiwi ki seiñ wow wanrah ya i bha i miat neibynta ki paidbah ka Ri-loom Jaiñtia.
Ya ka lehniam wa khaddooh daw pyndep mynstep ka 17 tarik ha chnong Mukhaialong, East Jaiñtia Hills.
Neiliang u Deputy CEM ka JHADC uwa man leh u MDC na Tuber Constituency, u Lasky Rymbai ynne ka sngi da ong u wa i khlaad noh yong u Ma Obil man i doohnong wa khroo ym du ya ka yung ka sem tangwa wot ya ki paidbah ka Ri-loom Jaiñtia hi waroh kawi.
