Jowai : Ynne i step heipor kamwa 9:15 kiwa kreh ka MeECL heipor wa dang kreh ki ha ka Jowai 33/11 KV Sub Station, Khimmusniang uwi uwa kreh kam u lineman da chah riñ u ha ka light wei da haap u najrong u chrot (post) wa niaam rong u.
Ya uni u bru da tip kam u Ratan Choudury uwa em kamwa 45 snem i rta.
Kiwa kreh da pyntip ki wa da tynyap lut ya ki line wa toh wow niaam rong ki wei u Ratan da kwah u wow niaam rong pyndep ya i bynta u chrot (post) light wa dang sah (uwa ym em u tynyap ya ka light) heiwa da chah riñ u.
Ini da jia i neidaw wa bakla u wei hadien ini da haap u cha madan.
Ki para wakreh da kit ki ya oo bran bran cha Dr. Norman Tunnel Hospital wei da pyrchang katwa ye wow sumaar ya oo tangwa neidaw wa joor wa mynsoo u da khlaad noh u ha kani ka thaw sumaar.
Da pynkit ya i metyap u Ratan cha Civil Hospital wow pyndep ya ka Postmortem wei hadien ini da kit ya oo cha Shillong wow ekti ya oo cha kiwa hayung u.
Discussion about this post