Uwi u nong India uwa na Karnataka wa lai puræ ha ka chnong Kharkiv kawa em cheiliang mihsngi ka ri Ukraine da khlaad noh u nei joor wa sait Bomb ka Russia ha kani ka chnong kawa man leh kawa ar wa heh dooh ka sor hapoh ka ri.
Ya ini leh da pyntikna da ka Ministry of External Affairs wa da dooh yei mynsien uni iwa da jia heipor step wei dang yaleh wow kynjoh ktien wa ki bei ki pa yong oo. Heijooh i por da pyntip wa u Foreign Secretary ka India da yaklam ki wa ki Ambassador ka Russia wa Ukraine yow e laad wow mih dei suk ki nong India kiwa dang sahkut ha Kharkiv wa kiwi ki bynta wa joor ka yaleh.
Uni uwa khlaad toh uwa dang 21 snem uwa tip kam u Naveen Shekharappa uwa dang lai puræ Doctor wei ini da jia i heipor wa dang yang u wow yoh baam wa saam da ka sorkar tangwa da shah siat Bomb ini i yung sorkar.
Da hap u wow mih neidaw wa da lut baam lut um ha i thaw wa rieh thma u deilang wa kiwi kiwa na Karnataka.
Neiliang u President ka Ukraine da ong u iwa jia ha Kharkiv toh thij kamwa leh ki Terrorist da ka Russia kawa da siat da ki Rocket wa ki Bomb heiwa da toh leh ki yung krehkaam ka sorkar.
