Ha i jia tyrrah kari wa da jia ynnin i miet ha 11 tarik ha Dkhiah, East Jaiñtia Hills District da khlaad arngut wa kynthup ya u Edwin Syrti, President ka HANM Eastern Circle wa u J. Khongsit u pulit ka 6th MLP Battalion.
Ini da jia i heipor kamwa 7:30 i miet, heiwa hapoh ka kari u Edwin da emlang sa uwi u pulit 6th MLP Battalion u M. Majaw uwa chong hadien uwa da mynsoo joor ha ini i jia hadien wa ka kari u Edwin ka Maruti Zen da tyrrah ko ya kawi ka truck wa pynyieñ ha rood sarok hajan ka Petrol Pump iwa man leh pyn hakhmat ka yung krehkaam ka HANM wa em ha Dkhiah.
Ka kari toh kawa wan na Wapung yow lai cha Khliehriat wei da tyrrah ko nadien ya ka truck wa pynyieñ harood sarok heiwa kiwa chong hakhmat da khlaad ki pyn heini i thaw wa jia.
Neiliang ka HANM East Jaiñtia Hills District da dap ko dei mynsien wa sñiawsih ya ini i jia hadooh wa dooh yei mynsien u President yong ka u Edwin Syrti uwa na ka chnong Lad Rymbai.
Ka seiñ da phah ko leh yei khubor sñiawlem cha kiwa ha yung hasem yong u Edwin kamjooh leh cha ki khon ki kti yong oo, “E wow chongsuk chongsaaiñ u deilang wa u Blai ha bneiñ,” ong ka seiñ.
